RIRHANDZU RA VAAKI RI KOMBISA LESWAKU MAFOSI “TRY BY FORCE” A RI MUNHU WA VANHU
Ku hundza ka Foster “Mafosi – Try By Force” Chauke ku siye ndyangu, vanghana, vatirhikulobye ni vaaki vo tala va ri ni gome lerikulu, kambe nseketelo lowu kombisiweke eka ndyangu wa yena wu paluxa leswaku Mafosi a ri munhu loyi a rhandziwa swinene.
Mafosi u hundzile emisaveni hi Mugqivela, 26 Ndzati 2026, eka mhangu ya movha loko a ri endleleni yo ya entirhweni. Ku hundza ka yeba emisaveni hi xitshuketa ku tseme timbilu ta vanhu vo tala lava a va n’wi tiva tani hi munhu wa ku n’wayitela, ku tsakisa vanhu ni ku hanya kahle na un’wana ni un’wana.
Loko ndyangu wa yena wu burisana na Mixo Justice Mashimbye eka nongonoko wa “Tiko Axi Etleli” ka Munghana Lonene FM hi Musumbhunuku, wu vule leswaku wu ha hlamarisiwe swinene hi ku lahlekeriwa loku. Ndyangu wu hlamusele Mafosi tani hi munhu loyi a a rhandzaka vanhu, a tshamela ku n’wayitela naswona a endla leswaku lava a ri na vona va titwa va amukelekile.
Ndyangu wu tlhele wu paluxa leswaku a wu ri eku lunghiseleleni ka mbulavurisano wa lovolo wa Mafosi, lowu a wu fanele ku va kona hi 23 N’wendzamhala 2026.
Vaaki na vona a va miyelanga. Ntlawa wa WhatsApp lowu tumbuluxiweke hi Sonto ku seketela ndyangu a wu fikile eka R52 100 hi nkarhi wa ku tsariwa ka mahungu lawa. Van’wamabindzu, vaaki, vanghana ni vanhu lava Mafosi a tshameke a tirha na vona eka switichi swo hambana-hambana swa radio va hlanganile ku seketela ndyangu wa ka Chauke.
Mafosi u tshame a tirha eka Giyani Community Radio, a ya eka Vision FM, kutani a hetelela a tirha eka Munghana Lonene FM. Rendzo ra yena eka radio ri n’wi endle munhu loyi a tivekaka ni ku rhandziwa hi vanhu vo tala.
Nseketelo lowu kombiwaka ndyangu wa ka Chauke wu vula swo tala hi munhu loyi Mafosi a a ri yena — munhu wa vanhu, wa ku n’wayitela, naswona loyi a siyeke xivandla lexikulu etimbilwini ta lava a va n’wi tiva.
Mafosi “Try By Force” Chauke u ta heleketiwa ka yindlu ya yena yo hetelela hi Mugqivela, 3 Nhlangula 2026, eCalvary Revival Centre eka Bungeni.
Reported by Maxelo Radio